Sasambahan adalah Percakapan antara dua orang/lebih yang dipakai oleh orang Minang Kabau. Sasambahan ini terdiri dari "Kapalo Mudo" dan "Sapangka". Dia melakukan percakapan saling berbalas balas. Text Sasambahan / Pasambahan biasa dilakukan pada saat tradisi orang minang, seperti : Mangaji, dan sebagainya. Berikut ini Text Sasambahan / Text Pasambahan :
Sasambahan
Kapalo
mudo
Ajo….
Sungguah pun ajo surang nan taimbau namo tasabuik gala, sarapek papek nyo sagalo
silang sapangka sarato karakok nan bajunjuang. Nan disabuik silang nan sapangka
adolah ajo baradiak bakakak, bamamak bakamanakan. Karakok nan bajunjuang adolah
sagalo urang sumando, singok sagisie halaman salalu. Pulang rundiangan kabakeh
ajo, apo bana buah nan baimbauan, dek karano erak jo jariah nan lah lapeh,
paluah didado alah kariang, rokok sabatang lah hanguih pulo. Dek kami, anak
mudo dalam korong kapalo mudo diateh nyo, takana lakuang nak maninjau kalam nak
manyigi. Lakuang nan ka kami tinjau, dalam nan ka disigi, alah bisa ko
rundingan kak di bukak ciek jo duonyo atau ado juo undangan nan ka ditunggu
lai. Sakian dulu jo……
Sapangka
Ruponyo
dek kapalo mudo tembak nan baagiah baalamaik, pandang babari batitisian, ujuang
e taantak pangkae batikam kabakeh badan diri ambo. Tapi sungguah pun ka ambo,
sarapek papek nyo silang nan bapangka sarato karakok nan bajunjuang. Nan
disabuik silang Nan sapangka adolah kami baradiak bakakak, bamamak bakamanakan.
Karakok nan bajunjuang, sagalo urang sumando, singok sagisie halaman salalu.
Apolah buah nan baimbauan, dek karano erak jo jariah nan lah lapeh, paluah di
dado alah kariang, rokok sabatang pun lah anguih pulo. Dek kapalo mudo takanan
lakuang nak maninjau, kalam nak manyigi. Lakuang nak ka batinjau, kalam nak
basigi, alah bisa ko rundiangan ka di bukak ciek duo nyo atau ado juo nan ka
ditunggu lai, kan baitu kato kapalo kapalo mudo tadi. Indak doh dek ambo, dek
kami tasabuik silang sapangka sakarakok bajunjuang, bak mangauik ndak sakali
kameh, bak mamacuang ndak sakali putuih, janji dipintak istirahat di ka
mungkokan. Manunggu kapalo mudo sabanta……
Kapalo
mudo
Sapanjang
kabanaran ajo tu, alah bama kato nan tasabuik, alah lurih jalan nan batampuah,
cupak tatagak nan baisi, janjang takanak nan batingkek, di dalam barih jo
balabeh, di dalam cupak dengan gantang, dikanduang adiak jo pusako,itulah kato
sabananyo. Lamak makan dek basamo jo, lamak kato ancak di pa iyo an. Ambo
tunggu jo……
Sapangka
Jo…...
dek tinggi batang lamo kajatuah, jauah jalan mangko ka sampai. Alah talalai
waktu dek abang, alah hilang isya dek mugarik, dek ulah mancari bulek nan
sagolek atau picak nan salayang. Rupo e kini alah dapek bulek nan sagolek picak
e nan salayang antaro kami silang nan sapangka sarato karakok nan bajunjuang.
Kok bulek e alah bisa di golek an, picak e alah bisa di layangan. Bulek ayia ka
pambuluahan, bulek kato ka mufakaik. Babarih juo nan bapahek, batakuak juo nan
batabang, bajanji batapek i. Dek tadi ambo nan bajanji, kini ambo pulo nan
manapek i. Kaba panangguangan badan diri ambo. Sakian dulu jo……
Kapalo
mudo
Baa
rupoe dek ajo tadi tacameh bunyie nan ka hanyuik, tagamang nan kajatuah adih di
agiah pakai dalih, kato babuek pakai misa. Mah dek tinggi batang lamo ka
jatuah, dek jauh jalan lambek ka sampai, alah talalai waktu dek abang, lah
hilang isi dek mugarik, dek ulah mancari bulek nan sagolek picak nan salayang,
rupoe kini alah dapek bulek nan sagolek picak nan salayang. Bulek e alah dapek
di golek an picak e alah bisa dilayangan, antaro silang nan bapangka sarato
karakok nan bajunjuang. Dek ajo nan marusuah nan manggamang setia nan
manjalani, angan- angan nan mambaok sansai, tantang mamulangkan perundingan
mah, babarih juo nan bapahek, batakuak juo nan batabang, bajanji batapek i. Dek
ajo tadi bajanji kini ajo pulo ka manapek i, kan itu nan marusuah, nan
manggamang, di bandan diri ajo. Dek kami ateh namo anak mudo dalam korong
kapalo mudo diateh e, indak ka bacari tanjuang nan babaliak, luhak nan baliku.
Adih diagiah pakai dalih, kato dibuek pakai misa, bak samisa urang tukang, asa
lai urang tukang bajanji alamaik rumah kasudah capek, alun kasanang hati jo……
Itulah Text Sasambahan Orang Minang Kabau, Text ini biasanya dihafal oleh Pemuda Kampung, Alim Ulama, Cadiak Pandai. Demikian, Semoga Blog ini bermanfaat.
Wassalamual'alaikum wr. wb
